நாங்கள் யார்

நம் நாட்டில் சுகாதாரக் கல்விச் சேவைகள் இருபதாம் நூற்றாண்டின் நடுப்பகுதியிலேயே தோற்றம் பெற்றன. ஆரம்பக் காலகட்டத்தில் இது சுகாதார சேவைகள் திணைக்களத்தின் பொதுசன சுகாதார அலகின் ஒரு சிறிய பகுதியாக இரண்டு பிரிவுகளாக இயங்கிவந்தது. பிரதம சுகாதாரக் கல்வி உத்தியோகத்தர் எனும் பதவியிலுள்ள சமூகவியலாளர், ஒரு சுகாதாரக் கல்வி உத்தியோகத்தர், இரு பிரச்சார உத்தியோகத்தர்கள் ஆகிய நால்வருமே இதன் ஒரு பிரிவான தலைமை அலுவலகத்தில் பணியாற்றி வந்தார்கள். மற்றய பிரிவான சுகாதாரக் கல்வி உபகரண உற்பத்தி அலகில் பயிற்றப்பட்ட பொதுச் சுகாதாரப் பரிசோதகர் பணியாற்றினார். பொதுக் கூட்டடங்கள் நடாத்துதல், சுவரொட்டிகள், துண்டுப்பிரசுரங்கள், சிற்றேடுகள் என்பவற்றை விநியோகித்தல் போன்ற செயற்பாடுகள் மூலமாக அக்காலத்தில் மிகவும் பொதுவான தொற்று நோய்களான மலேரியா, புழுத்தொற்று, வயிற்றோட்டம், நெருப்புக் காய்ச்சல் போன்றவற்றைத் தடுப்பதே இதன் பிரதான குறிக்கோளாக இருந்தது. 1950 களின் போது வெளியிடத் தொடங்கிய "சபத" எனும் சஞ்சிகையானது சுகாதார உத்தியோகத்தர்களின் அறிவை விருத்தி செய்வதற்கு உதவியாக இருந்ததது. அடுத்த முக்கிய படியானது மாவட்ட அளவிலான பிரிவுகளைத் தோற்றுவித்தமையும், அதற்குப் பொறுப்பாக, சுகாதாரக் கல்வியை வழங்குவதற்குப் பயிற்றப்பட்ட பொதுச் சுகாதாரப் பரிசோதகர் ஒருவரை சுகாதாரக் கல்வி வழங்குனர் எனும் பதவியின் கீழ் அப்பிரிவிற்குப் பொறுப்பாக நியமித்தமையும் ஆகும். மத்திய தலைமைப் பிரிவின் வழிகாட்டலின் கீழ் தத்தமது மாவட்டங்களிற்கான சேவைகளுக்குப் பொறுப்பாக இவர்கள் விளங்கினர். ஒலி/ஒளி உபகரணங்கள் பொருத்தப்பட்ட வாகனங்கள் ஒவ்வொரு மாவட்டத்திற்கும் வழங்கப்பட்டன. சுகாதாரக் கல்வி உத்தியோகத்தர்களின் பிரதான பணி தகவல் பரப்புவது எனினும், அவர்கள் மேலதிகமாக வெளிக்கள சுகாதார உத்தியோகத்தர்களிற்கு கல்வி கற்பித்தல் சாதனங்கள் மற்றும் வழிகாட்டுதலை வழங்கியதன் மூலம் அவர்களுடைய சுகாதாரக் கல்வி நடவடிக்கைகளுக்கு உறுதுணையாக இருந்தனர். சுகாதாரக் கல்வியில் முதுகலைத் தகைமைகளைக் கொண்டுள்ள, நிர்வாகத் தர வைத்திய அதிகாரி ஒருவரை இப்பிரிவிற்குப் பொறுப்பாக நியமித்தமையின் மூலம் 1970களின் நடுப்பகுதியில் இதன் சேவைகள் மீளொழுங்குபடுத்தப்பட்டன. தலைமை அலுவலகத்தில் உள்ள பிரிவானது, சுகாதாரக் கல்வி உபகரண உற்பத்தி அலகுடன் இணைக்கப்பட்டு. சுகாதார அமைச்சின் கீழ் சுகாதாரக் கல்விப் பிரிவு எனும் தனி ஒரு பிரிவாக இயங்கத் தொடங்கியதுடன் இதற்குப் பொறுப்பாக நிர்வாக எல்லைக்குட்பட்ட பணிப்பாளர் ஒருவர் நியமிக்கப்படார். பிற்காலத்தில் இப்பதவியானது பணிப்பாளர் - சுகாதாரக் கல்வி மற்றும் பிரச்சாரம் என மாற்றம் பெற்றது. அடுத்த சில வருடங்களில் உலக சுகாதார ஸ்தாபனத்தின் ஆதரவுடன் சடுதியான அபிவிருத்தி ஏற்படுத்தப்பட்டு குடும்ப சுகாதாரப் பணியத்தின் வழியில் இவ் அமைப்பும் முழுமையான ஒரு பணியகமாகத் தோற்றம் பெற்றது. தற்போது சுகாதாரக் கல்விப் பணியகத்தின் உத்தியோகத்தர் குழாமானது ஒரு முழுநேரப் பணிப்பாளர், நான்கு சமுதாய மருத்துவ நிபுணர்கள், ஒரு சமுதாயப் பற்சிகிச்சை நிபணர், சுகாதாரக் கல்வியில் முதுகலைமாணித் தேர்ச்சி பெற்ற 5 சுகாதாரக் கல்வி உத்தியோகத்தர்கள் மற்றும் 2 பட்டமேற்படிப்பு தமைமையுள்ள பிரச்சார அலுவலர் என்பவற்றைக் கொண்டுள்ளது. அதிகரித்துவரும் தொற்றா நோய்களின் பாதிப்புகளும், ஆபத்துமிக்க விளைவுகளை ஏற்படுத்துகின்ற திடீரெனப் பரவும் தொற்று நோய்களும், வினைத்திறன் மிக்க சுகாதார மேம்பாட்டு நடவடிக்கைகளைத் திட்டமிடுதல், செயற்படுத்துதல், கண்காணித்தல் மற்றும் மதிப்பாய்வு செய்தல் போன்றவற்றிற்கான அவசியத்தை உணர்த்தியுள்ளதுடன், சுகாதாரக் கல்விப் பணியத்தை சுகாதார மேம்பாட்டுப் பணியகமாக மாற்றுவதற்கும் அடிப்படைக் காரணமாக உள்ளது. தேசிய சுகாதார மேம்பாட்டுக் கொள்கையில் குறிப்பிடப்பட்டுள்ள மூலோபாயங்களை, வினைத்திறன்மிக்க முறையில் செயற்படுத்துவதற்காக, சுகாதார மேம்பாட்டுப் பணியத்தில் பன்னிரண்டு விசேட பிரிவுகள் உள்ளன.