Information Environment Assessment tool

ලෝක සෞඛ්‍ය සංවිධානයේ මූලස්ථානය (WHO Headquarters), ලෝක සෞඛ්‍ය සංවිධානයේ දකුණු-නැගෙනහිර ආසියානු කලාපීය කාර්යාලය (WHO SEARO), සහ ශ්‍රී ලංකාවේ පිහිටි ලෝක සෞඛ්‍ය සංවිධානයේ මෙරට කාර්යාලය (WHO Country Office), සෞඛ්‍ය අමාත්‍යාංශයේ සෞඛ්‍ය ප්‍රවර්ධන කාර්යාංශය සමඟ එක්ව ‘තොරතුරු පරිසර තක්සේරු මෙවලම’ (Information Environment Assessment tool) සම-නිර්මාණය සහ සම-සැලසුම් කිරීම සඳහා සහාය දැක්වීමේ අරමුණින් දෙදින වැඩමුළුවක් ශ්‍රී ලංකාවේදී පැවැත්වීය. ඉන් අනතුරුව, මෙවැනිම සම-නිර්මාණ වැඩමුළුවක් තායිලන්තයේදී ද පවත්වන ලදී.

මෙම වැඩමුළුවල ප්‍රතිඵල මෙන්ම ශ්‍රී ලංකාවෙන් සහ තායිලන්තයෙන් ලැබුණු ප්‍රායෝගික අත්දැකීම් සහ උගත් පාඩම්, මෙම මෙවලම සංවර්ධනය කිරීමටත්, වඩාත් පිරිපහදු කිරීමටත් කැපී පෙනෙන දායකත්වයක් ලබා දුන්නේය.

මෙම ‘තොරතුරු පරිසර තක්සේරු මෙවලම’ දැන් ප්‍රයෝජනයට ගැනීමට හැකි මට්ටමක පවතිනු දැකීම පිළිබඳව මම බෙහෙවින් සතුටු වෙමි. එය සෞඛ්‍ය තොරතුරු, සන්නිවේදනය, ප්‍රජා සහභාගීත්වය සහ අවදානම් සන්නිවේදනය (risk communication) යන ක්ෂේත්‍රවල නියැලෙන්නන්ට කාලෝචිත මෙන්ම අතිශය වටිනා සම්පතක් සපයයි.

විශේෂයෙන්ම සමාජ මාධ්‍ය හරහා වැරදි තොරතුරු (misinformation) සහ සාවද්‍ය තොරතුරු (disinformation) වේගයෙන් පැතිර යා හැකි, එමෙන්ම කෘත්‍රිම බුද්ධිය (AI) මගින් තොරතුරු නිර්මාණය වන, පරිශීලනය වන සහ බෙදාහැරෙන ආකාරය පරිවර්තනයකට ලක් කරමින් පවතින වර්තමාන ශීඝ්‍රයෙන් වෙනස් වන තොරතුරු පරිසරය තුළ මෙය අතිශයින් වැදගත් වේ. තොරතුරු පරිසරය ක්‍රමානුකූලව වටහා ගැනීම මගින් වඩාත් ප්‍රතිචාරාත්මක, සාක්ෂි මත පදනම් වූ සන්නිවේදන ප්‍රවේශයන් සැකසීමටත්, මහජන විශ්වාසය තහවුරු කිරීමටත්, තමන්ගේ සෞඛ්‍යය පිළිබඳ නිසි දැනුවත්භාවයකින් යුතුව තීරණ ගැනීමට ජනතාවට සහාය වීමටත් අපට උපකාරී වේ.